EENSAAMHEID OORDENKINGS: VRYDAG 12 JULIE 2024
2 KORINTIËRS 1:3-4: “Aan God, die Vader van ons Here Jesus Christus, kom al die lof toe! Hy is die Vader wat Hom ontferm en die God wat in elke omstandigheid moed gee. In elke moeilikheid bemoedig Hy ons. Daarom kan ons ook ander bemoedig wat in allerlei moeilikhede verkeer. Ons kan hulle bemoedig met dieselfde bemoediging waarmee God ons bemoedig,”
Eensaamheid kan soos ‘n monster voel, ‘n groot golf wat jou oorweldig. Jy mag voel dat jy nie daarteen kan opstaan nie. In sulke tye wil ek jou aanmoedig om jou eensaamheid te deel. Dra dit nie alleen nie, want jy is nie alleen in jou stryd nie. Ons teks herinner ons daaraan dat God die Vader van barmhartigheid en alle vertroosting is. Al los die wete nie onmiddellik ons eensaamheid op nie, weet ons dat Jesus, wat ons pyn gedeel het, by ons is. Ons kan met eerlike en selfs hewige taal na Hom roep, soos die Psalm digter “Vergeet tog nie om genadig te wees?” God is daar om ons te troos en ons te dra deur ons donkerste oomblikke.
In tye van eensaamheid en swaarkry, onthou dat ons nie alleen is nie. Ons God, die Vader van ons Here Jesus Christus, is die bron van ontferming en moed. Hy is altyd by ons, gereed om ons te troos en te versterk, ongeag ons omstandighede. Wanneer ons bemoedig word deur Sy liefde en teenwoordigheid, gee dit ons die krag om ook ander in hul moeilike tye te bemoedig. Onthou ons ontvang die troos van God sodat ons dieselfde troos kan oordra aan ander. Laat ons mekaar ondersteun en herinner aan die hoop en moed wat ons in God vind.
GEBED: Liewe Hemelse Vader, Dankie dat U die Vader van barmhartigheid en alle vertroosting is. Ons kom na U met ons eensaamheid en ons vra vir U hulp en troos. Gee ons die moed om ons eensaamheid met ander te deel en ons hart oop te maak vir U. Help ons om te besef dat ons nie alleen is nie, en om ander te bemoedig deur ons eie ervarings. Vul ons met U liefde en vertroosting, sodat ons die krag kan vind om aan te gaan. Dankie dat U altyd by ons is en dat U ons nooit verlaat nie. In Jesus se Naam bid ons, AMEN