OORDENKINGREEKS VIR TIENERS: MAANDAG 16 SEPTEMBER 2024
1 PETRUS 3 VERS 8 & 9: “.Wees almal eensgesind, medelydend, liefdevol, goedhartig, nederig. Moenie kwaad met kwaad vergeld of belediging met belediging nie. Inteendeel, antwoord met ‘n seënwens, want daartoe is julle geroep, sodat julle die seën van God kan verkry..
Deernis is een van die mooiste eienskappe wat ons as Christene kan uitleef, veral in ‘n wêreld wat dikwels vol haat, verdeeldheid en konflik is. Ons leef in tye waar ons dikwels wegkyk van die nood van ander, of ons is so besig dat ons vergeet om empatie te hê met die mense rondom ons. Tog leer die Bybel ons om ’n naaste liefde, deernisvolle en nederige gesindheid te hê. Hierdie dinge is nie net mooi eienskappe nie, maar dit is noodsaaklik vir ons as volgelinge van Christus om werklik vir ander om te gee.
Empatie beteken om jouself in iemand anders se skoene te plaas, om hulle seer en pyn saam met hulle te voel, selfs al het jy nie dieselfde ervarings nie. As jou vriend of buurman hartseer is oor iets, kan jy deur jou empatie hulle pyn verstaan en saam met hulle uiterlik of innerlik huil. Dit is ‘n praktiese manier waarop ons God se liefde aan die wêreld kan wys. Deernis roep ons om nie net te voel vir ander nie, maar om daadwerklik iets te doen om hulle te help – al is dit net om by hulle te wees, te luister of om ‘n bemoedigende woord te spreek.
Ons kan nie almal se probleme oplos nie, maar ons kan wel vir ander bid, hulle ondersteun en vriendelik wees. Wanneer ons vriendelikheid en begrip aan ander betoon, wys ons vir die wêreld die liefde van Jesus. Ons wêreld sal ‘n beter plek wees as ons minder fokus op wat ons verdeel en meer fokus op wat ons bymekaar bring – ons gemeenskaplike menswees, en die feit dat ons almal deur God geskape is. Deernis en empatie skep die soort verhoudings wat ons roeping as Christene weerspieël, en dit is deur hierdie klein dade van liefde dat ons God se hart vir die wêreld kan wys.
GEBED: Liewe Here, dankie dat U ons leer wat ware liefde en deernis is. Help ons om empatie, vriendelikheid en begrip in ons daaglikse lewe te toon. Gee ons die moed om op te staan vir ander wanneer hulle swaarkry en om hulle te ondersteun met ‘n sagmoedige hart. Leer ons om altyd U liefde te weerspieël in alles wat ons doen. AMEN.