STILLE SATERDAG 30/03/2024
Skriflesing: Matteus 27:59-61 “Josef het die liggaam geneem en dit in skoon linne toegedraai en dit daarna neergelê in sy eie nuwe graf wat hy in die rots uitgekap het. Hy het ‘n groot klip voor die ingang van die graf gerol en weggegaan. Maria Magdalena en die ander Maria was ook daar en het reg voor die graf gesit.”
Hierdie dag is gevul met stilte en verslaenheid, soos ‘n waas van rou oor die land. Josef van Arimathea, ‘n man van moed en medelye, het die voorreg gehad om initiatief te neem deur Pilatus te versoek om Jesus se liggaam te begrawe. Saam met Maria – die moeder van Jesus – en Magdalena sorg hy vir die liggaam en plaas dit in die graf. Dit was ’n klein begrafnis in ons Afrika terme beslis. Hierdie klein groepie mense, gewond en gemartel deur verdriet, bly agter by die graf, oorstelp as gevolg van ‘n gevoel van verlies en leegte. In stilte ween hulle met verlatings verdriet.
In ons eie tyd word ons ook gekonfronteer met verslaenheid. Ek onthou hoe verslae ek was by die graf van my Vader, (begrafnis dag) hoe ek een kant toe geloop het en met rouverdriet uiting gegee het aan my gevoel van verlatenheid. Op Stille Saterdag gaan my gedagtes altyd uit na al die mense wat rondom ‘n graf gestaan het om geliefdes ter ruste te lê. Ons onvermoë om afskeid te neem, hul permanente afwesigheid te aanvaar, al staan ons by die graf, is ‘n pynlike realiteit vir baie mense. Ons kan nie altyd woorde van troos vind nie, en dikwels is dit net die stilte wat tog so gepas op so ‘n hartseer oomblik.
Môre is dit Paas Sondag, ‘n dag van hoop en vernuwing. Dit herinner ons daaraan dat die dood nie die laaste woord het nie. Selfs te midde van ons rou en gemis, hou ons aan die hoop vas dat lig uiteindelik die duisternis sal verdryf. Dat Hy gesterf het, in die graf lê en opgestaan het om dit moontlik te maak dat ons kring weer vol sal raak. Eendag weer, Eendag weer..! Laat ons in hierdie tyd, ondanks ons verdriet, bid vir almal wat na ure, dae, maande, jare steeds met verlies en pyn worstel.
Gebed: Liefdevolle God, op hierdie Stille Saterdag kom ons tot U met swaar harte en verslane geeste. Troos asseblief almal wat die pyn van verlies en gemis ervaar, veral in hierdie tyd van beperkinge en afsondering. Gee ons die krag om vas te hou aan die hoop van die opstanding, en om te glo dat u liefde en lig die donkerste oomblikke sal verlig. Amen