“As Pasen en Pinksteren op een dag val”
WOENSDAG 10 APRIL 2024
JOHANNES 20:22 “En nadat Hy dit gesê het, blaas Hy op hulle en sê vir hulle: Ontvang die Heilige Gees.”
Voor Pinkster vier ons nog die fees van Hemelvaart. Jesus sê: “As Ek nie gaan nie, kan die Trooster (Die Heilige Gees) nie na julle toe kom nie.” Jesus moet vanuit ‘n nuwe plek werk, vanaf die regterkant van die Vader. Daar moet ons harte wees, daarheen moet ons gees gerig wees. Ons moet die aardse Jesus loslaat en ons nou rig op die hemelse, in geloof dat Hy vir ons uitgegaan het en ‘n plek vir ons voorberei het by die Vader. Hier op aarde gee Hy vanuit die Vader aan ons die Gees wat ons nodig het om in sy voetspore te loop.
As ek dan weer dink aan die uitdrukking: “As Paasfees en Pinkster op een dag val,” wat ons gebruik om iets onmoontlik aan te dui, dink ek nou aan die woorde: By God is niks onmoontlik nie. Dit is selfs moontlik dat gewone mense soos die meeste van ons in 2024, met hul sterktes en swakhede, weer begeesterd, vol vuur en vol vergewende liefde word, dat ons weer woorde sal vind om te getuig oor al die mooi en goeie dinge wat God ons deur Jesus gegee het., die spreekwoord is hier en nou, by God is alles moontlik. Ons gaan die uitstorting van Die Heilige Gees weer vier met hemelvaart en Pinkster, maar ons hoef nie eers so lank te wag nie. Vandag, hier en nou, u en ek. Hy het sy asem oor ons geblaas. Ons kan dus aan die werk gaan.
GEBED: Liewe Vader, ons dank U vir die gawes van Hemelvaart en Pinkster. Mag ons harte en geeste gerig wees op die hemelse realiteit van U koninkryk, terwyl ons die aardse loslaat. Help ons om die begeestering en die vuur van die Heilige Gees in ons harte te ontvang, sodat ons weer die boodskap van liefde en vrede met oorgawe kan verkondig. Gee ons die krag om in u voetspore te stap en u wil te volg. In Jesus se naam bid ons, AMEN.