OORDENKING OOR SELFLIEFDE VIR TIENERS: MAANDAG 9 SEPTEMBER 2024.
PSALM 139 VERS 14: “Ek wil U loof, want U het my op ‘n wonderbaarlike wyse geskep. Wat U gedoen het, vervul my met verwondering. Dit weet ek seker…”
Spieëls kan soms ons grootste vyand wees. Hulle wys elke pimpel, elke onsigbare letsel wat net ons sien, en dit maak dit maklik om in ons eie oë minderwaardig te voel. Dit is in hierdie oomblikke dat ons begin vra: “Hoekom kon God nie net hierdie of daardie klein foutjie wegvat nie?” Ons sê dalk dinge soos, “Ek is lelik,” en begin glo dat ons nie goed genoeg is nie. Maar wanneer ons dit sê, vergeet ons iets belangriks—ons sê dit oor God se skepping. God het jou gemaak, presies soos jy is, en Hy het jou gemaak met doel en liefde.
God het ons nie per ongeluk of sonder doel gemaak nie. Hy het elkeen van ons uniek geskep, met spesifieke eienskappe wat ons spesiaal maak. Dit is maklik om onsself te vergelyk met ander en te dink ons is minderwaardig, maar God roep ons om onsself deur Sy oë te sien—wonderlik, kosbaar en geliefd. Dit is belangrik om nie net fisiese selfvertroue te bou nie, maar ook geestelike selfvertroue. As jy in die spieël kyk, onthou dat jy God se pragtige skepping is. Werk nie net aan jou uiterlike nie, maar ook aan jou verhouding met God en jou innerlike self.
Die lewe is kort en tyd is kosbaar. In plaas daarvan om gefokus te wees op wat jy nie is nie, begin fokus op wie God sê jy is. Buitendien wie het tog bepaal wat mooi is en wat nie… Maak tyd om vir jou ouers, jou vriende, en God te sê jy waardeer hulle. Onthou, jy is “pragtig en wonderbaarlik” gemaak. Jou lewe het doel, en God het ’n plan vir jou. Vertrou Hom met jou hele hart en leef soos ’n kind van God—vol selfliefde en geloof.
GEBED: Here, dankie dat U my op ’n wonderbare wyse geskep het. Help my om onsself deur U oë te sien, en nie deur die wêreld se standaarde nie. Gee my die moed om myself te aanvaar en lief te hê soos U my gemaak het. Lei my om te groei in selfvertroue, nie net in hoe ek lyk nie, maar ook in my verhouding met U. Ek vertrou U met my lewe en ek weet dat U ’n wonderlike plan vir my het.