BENDEGEWELD OORDENKING: MOENIE STILBLY NIE
Spreuke 4: 14 – 17 sê, “Betree nie die pad van die goddelose nie, en loop nie op die weg van die slegtes nie. Vermy dit, moenie daarop gaan nie; draai daarvan af weg en gaan verby. Want hulle kan nie slaap nie, tensy hulle kwaad gedoen het; hulle word van die slaap beroof, tensy hulle iemand laat struikel het. Want hulle eet die brood van goddeloosheid en drink die wyn van geweld.”
Bykans 120 moorde en meer as 90 pogings tot moord vanaf 24 tot 30 Junie in die Wes-Kaap – die meeste hiervan volgens ingeligte bronne op die Kaapse Vlakte en in dele van die Boland. Bendegeweld is ‘n plaag wat baie van ons gemeenskappe teister en wat onmeetbare skade en hartseer veroorsaak.
Wat kan ons doen in die aangesig van sulke donkerte? Gemeenskappe van geloof het ’n belangrike rol om uit te leefl. Net soos bendes hulself sigbaar en invloedryk maak in hul bende grondgebiede, moet die kerk ook ‘n konstante, positiewe teenwoordigheid in die gemeenskap wees. Dit behels meer as net die oop wees van die kerkgebou; dit beteken dat die mense van die kerk aktief, sigbaar en betrokke moet wees. Deur veilige toevlugsoorde te skep vir kwesbare en geboeliede kinders, ons moet aan hulle ondersteuning en aanmoediging bied, en teenwoordig wees op die plekke waar jongmense bymekaarkom. Kan die kerk ‘n positiewe alternatief bied vir die aantreklikheid van die bendeliefde. Dit is van kardinale belang dat die kerk die talente van jongmense waarneem, hul drome aanmoedig en hulle help om sukses na te streef op ‘n manier wat God eer en die gemeenskap opbou.
Ons moet proaktief wees in ons benadering tot die jeug. Deur kreatiewe metodes in te span om sigbaarheid te handhaaf en ware sorg te toon vir die welsyn van jongmense, kan ons ‘n betekenisvolle impak maak. Ons pogings kan die gety teen bendegeweld laat draai deur ‘n koesterende omgewing te bied waar liefde, respek en hoop floreer. Deur die liefde en leringe van Christus te beliggaam, kan ons jongmense wegwys van die pad van boosheid en lei na ‘n pad van lewe en lig.
GEBED Liewe Here, ons kom voor U met swaar harte, oorweldig deur die geweld en pyn wat bendes op ons gemeenskappe afdruk. U Kerk, Ons, vra vir U wysheid en leiding terwyl ons poog om ‘n lig in die donkerte te wees. Help ons om teenwoordig en sigbaar in ons gemeenskappe te wees, ‘n veilige toevlug en ‘n bron van hoop te bied vir diegene wat kwesbaar en verlore is. Gee ons die moed om uit te reik, om die talente van jongmense waar te neem en te koester, en om hulle aan te moedig om hul drome na te streef op ‘n manier wat U eer. Mag ons pogings verandering en genesing bring, harte wegdraai van die pad van sinlose geweld en verslawing en na U liefde en vrede lei. In Jesus se naam bid ons. AMEN