29012025 ONTDEK DIE KRAG VAN WOORDE SPREUKE 26 VERSE 23 TOT 27

DAG 3 – 29 Jan 2025 HAAT SKUIL IN BEDRIEGLIKE VOORKOMS

Spreuke 26 vers:25: “Al klink sy stem vriendelik, glo hom nie, want daar is sewe gruwels in sy hart.”

Ons teks wys hoe iemand se woorde aangenaam kan klink, terwyl hul ware bedoelings boos is. Soos Salomo waarsku, is dit moontlik dat agter ‘n vriendelike voorkoms, haat en misleiding skuil. Hierdie teks nooi ons om nie alles wat ons hoor of sien, op die oppervlak te aanvaar nie, maar om wysheid te soek om ander se ware bedoelings te onderskei.

In Spreuke gebruik Salomo die beeld van iemand wat met ‘n vriendelike stem praat, maar in wie se hart “sewe gruwels” woon. Hierdie gruwels verwys na boosheid, misleiding, en selfs vernietigende planne. Die waarskuwing is eenvoudig: moenie net op woorde staatmaak om iemand se karakter te bepaal nie, want woorde kan bedrieglik wees.

Die Bybel gee verskeie voorbeelde van hierdie beginsel. In 1 Konings 22 sien ons hoe koning Agab vermomming gebruik om sy vyande te mislei, maar sy boosheid lei uiteindelik tot sy val. Sy uiterlike poging om die waarheid te verdoesel, kon nie God se planne omseil nie.

In die hedendaagse wêreld ervaar ons ook skynheiligheid en misleiding. Dit is veral waar as dink aan politici wat mooi beloftes maak, maar korrupsie agter geslote deure beoefen. Hul woorde klink oortuigend, maar hul dade weerspreek hul uitsprake. Hierdie vers herinner ons om waaksaam te wees en nie deur uiterlike vriendelikheid mislei te word nie. Ons moet vir leiers bid wat regverdigheid nastreef en self onberispelik is, sodat hulle ware diensbaar is aan God en sy mense. Om hierdie wysheid te kweek, moet ons: Gebed doen om onderskeidingsvermoë van die Heilige Gees te ontvang. Mense se dade en woorde teen die Woord van God toets. Self reflekteer om te verseker dat ons woorde en bedoelings opreg is.

Introspeksievrae

1. Is daar mense in my lewe wie se woorde ek moet toets teen hul dade?
2. Hoe kan ek wysheid vra om misleiding vroegtydig te herken?
3. Gebruik ek self woorde wat dalk nie met my ware bedoelings ooreenstem nie?

GEBED Here, Help my om ander se woorde en bedoelings met wysheid en onderskeiding te hanteer. Gee my ‘n opregte hart wat altyd U waarheid weerspieël. Lei my om lief te hê sonder skyn en om vry van misleiding te leef. U is die Bron van alle waarheid, Here. AMEN