VADERSDAG PREEK 14/6/26 ’N MAN VAN GOD IN ’N WÊRELD VAN KULTUURDRUK.
GEBED VOOR SKRIFLESING
Here, ons kom stil voor U met oop harte. Maak u Woord vir ons lewend en duidelik. Laat ons nie net hoor wat ’n man behoort te wees nie, maar laat ons Christus sien, die ware Mens, die volmaakte Voorbeeld. Vorm ons deur U Gees, sodat ons U gehoorsaam volg. In Jesus se Naam. AMEN
SKRIFLESING: 1 Timoteus 6:11–14 “Maar jy, man van God, moet van hierdie dinge wegvlug. Streef na opregtheid, godsvrug, geloof, liefde, volharding, sagmoedigheid. In die goeie stryd van die geloof moet jy al jou kragte inspan; gryp die ewige lewe aan, waartoe jy geroep is en waarvan jy voor baie getuies so ’n goeie belydenis afgelê het. Voor God wat aan alles die lewe gee, en voor Christus Jesus wat voor Pontius Pilatus die goeie belydenis afgelê het, beveel ek jou: Gehoorsaam hierdie opdrag onberispelik en onwankelbaar totdat ons Here Jezus Christus kom.”
PREEK
Inleiding
Wat beteken dit werklik om vandag ’n ware man te wees? As ons na die wêreld rondom ons kyk, word ons oorstroom met teenstrydige boodskappe. Aan die een kant dikteer (voorskryf) die kultuurdruk dat manlikheid gemeet word aan mag, rykdom, status en die meedoënlose najaag van eie belang. Sukses word gedefinieer deur hoeveel jy kan versamel en hoe hard jy jou eie koninkryk kan bou. Aan die ander kant beleef ons ’n krisis van traagheid amper luiheid, waar mans dikwels hul verantwoordelikhede ontduik.
Ware manlikheid gaan egter nie oor spiere, groot bankrekeninge of selfsugtige dominansie nie. ’n Ware man neem verantwoordelikheid. Hy doen die regte ding, selfs wanneer niemand kyk nie, net soos ‘n man wat sonder ophef ook die gras van die bejaarde buurvrou sny bloot omdat dit is wat ’n man doen. Regte mans doen wasgoed en was skottelgoed omdat hul manlikheid nie ge-‘label’ word deur outydse rolverdelings nie. Regte mans is nie ontrou nie, bedrieg nie en verkoop nie hul siel aan die hoogste bieder vir persoonlike gewin nie.
In die midde van hierdie intense kultuurdruk roep God se Woord ons op tot ’n hoër standaard. Paulus skryf vir Timoteus en gee vir hom ’n bloudruk van hoe ’n ware man van God lyk. Dit is ’n radikale alternatief vir die wêreld se definisie.
‘n Man van God word geken aan sy dade
Paulus begin sy opdrag aan Timoteus met ’n kragtige opdrag: “Maar jy, man van God, moet van hierdie dinge wegvlug.” Die frase “hierdie dinge” verwys direk na die liefde vir geld, die najaag van rykdom en die vernietigende gierigheid wat in die vorige verse beskryf is. In ’n wêreld wat skreeu dat geld geluk en status koop, moet die man van God in die teenoorgestelde rigting hardloop.
Hierdie wegvlug is nie ’n teken van swakheid of lafhartigheid nie; dit is juis ’n daad van pure geestelike dapperheid en manlikheid. Dink aan Josef in Egipte wat fisies weggevlug het van die versoeking van Potifar se vrou. Hy het geweet dat om te bly, sou beteken om sy integriteit en sy verhouding met God te beskadig.
Om weg te vlug beteken dat jy aktief kies om giftige omgewings, oneerlike praktyke en die kultuur van gierigheid agter te laat. Dit beteken jy weier om ryk te word ten koste van ander. ’n Ware man van God herken die strikke van die vyand en het die ruggraat om om te draai en weg te stap van dit wat sy siel kan vernietig.
’n Man van God word geken deur wat hy nastreef
Dit is egter nie genoeg om net weg te hardloop van die slegte dinge af nie; ’n Vakuum moet gevul word.
Waar die wêreld aggressie en selfgeldendheid prys, roep God ons na sagmoedigheid en liefde. Waar die kultuur kitsoplossings en vinnige sukses soek, vra God vir volharding en geloof. Om hierdie dinge na te jaag, is ’n daaglikse, doelbewuste keuse. Dit is soos om ’n geestelike atleet te wees wat elke dag oefen om beter te word in die dinge wat ewigheidswaarde het.
Paulus sê ons moet aktief streef na ses spesifieke eienskappe: opregtheid, godsvrug, geloof, liefde, volharding en sagmoedigheid. Dit is die karaktereienskappe wat die lewe van ’n ware man van God definieer.
’n Man wat hierdie dinge najaag, verander sy omgewing. By die huis is hy ’n veilige hawe vir sy vrou en kinders omdat hy liefde en sagmoedigheid uitleef. By die werk word hy gerespekteer omdat sy opregtheid bo alle verdenking staan. Hy bou nie sy eie koninkryk nie, maar hy saai saad van God se koninkryk oral waar hy gaan. Dit is die merk van ware grootsheid.
’n Man van God veg nie vir ego nie, maar vir geloof
Manlikheid impliseer dikwels ’n vegtery, maar die man van God veg nie met die wapens van die wêreld nie. Paulus sê: “In die goeie stryd van die geloof moet jy al jou kragte inspan.” Ons veg nie teen mense nie, en ons veg nie vir aardse mag nie. Ons veg ’n geestelike stryd om die geloof suiwer te hou en om vas te hou aan die ewige lewe.
Hierdie stryd vra dat ons al ons kragte inspan. Dit is nie vir die ruggraatlose of die trae en luie toeskouers nie. Dit vra waaksaamheid. Dit beteken om op te staan vir die waarheid wanneer dit ongewild is. Dit beteken om te veg vir jou huwelik, jou gesin en jou gemeenskap deur op jou knieë te gaan in gebed en deur die waarheid in liefde te praat.
Die beeld van ’n vegter is gewortel in die manlike psige (denke), maar die Bybelse vegter beskerm die swakkes, verdedig die waarheid en weerstaan die leuens van die kultuur. Hy verkoop nie sy siel aan die hoogste bieder nie, maar hy bly staan as ’n baken van lig in ’n donker wêreld.
’n Man van God word geken deur sy onwankelbare lojaliteit
Die man van God word geken deur sy onwankelbare lojaliteit en trou. Paulus gee vir Timoteus ’n ernstige bevel voor God en Christus Jesus: “Gehoorsaam hierdie opdrag onberispelik en onwankelbaar totdat ons Here Jesus Christus kom.” Die fondament van hierdie trou is die voorbeeld van Jesus self, wat voor Pontius Pilatus die goeie belydenis afgelê het en getrou gebly het tot die dood toe.
In ’n wêreld waar beloftes maklik gebreek word en lojaliteit net duursaam is solank dit gerieflik is, is die man van God ’n man van sy woord. Hy hou sy commitments aan sy gesin, sy bure en sy kerk, selfs wanneer dit hom persoonlik iets kos. Sy “ja” is ja, en sy “nee” is nee.
Hierdie trou is nie tydelik nie; dit is volhoubaar tot die einde toe. Hy bly onberispelik en onwankelbaar, ongeag hoe sterk die winde van kultuurdruk en influencers waai. Sy oë is gevestig op die koms van die Here Jesus Christus, en dit is daardie ewige perspektief wat hom die krag gee om vandag getrou te bly.
Samevatting
Die uitdaging voor ons is duidelik. Die wêreld het ’n dringende behoefte aan egte mans—mans van God wat weier om te deel te word van (konformeer aan) die patrone van hierdie wêreld. ’n Regte man staan op en neem verantwoordelikheid. Hy kyk nie net na sy eie belange nie, maar hy dien sonder selfsug, sonder om erkenning te soek.
Kom ons reflekteer vandag eerlik oor ons eie lewens. Waarvan hardloop jy weg, en wat jaag jy na? Is jy besig met die goeie stryd van die geloof, of het jy moeg geword en ingegee aan die druk van die samelewing? Dit is tyd om die ewigheid aan te gryp waartoe God jou geroep het.
Laat ons mans wees wat geken word aan ons integriteit, ons liefde en ons onwankelbare gehoorsaamheid aan God. Mag die Here vir ons die genade gee om onberispelik te lewe, sodat wanneer Christus kom, Hy ons getrou sal vind. Staan vas, veg die goeie stryd, en wees die man wat God jou geroep het om te wees. AMEN
GEBED NA PREEK
Here God, Ons bely dat die druk van hierdie wêreld dikwels swaar op ons rus en dat ons soms struikel. Skenk aan ons mans die moed om weg te vlug van die strikke van gierigheid en oneerlikheid. Gee hulle die krag om opregtheid, liefde en sagmoedigheid na te jaag. Versterk ons almal om die goeie stryd van die geloof te veg en onwankelbaar getrou te bly aan U koninkryk. Mag ons lewens U naam verheerlik. AMEN
Seënbede
Mag die Here julle seën en julle beskerm teen die versoekings van hierdie wêreld.
Mag die Here Sy aangesig oor julle laat skyn en julle vul met Sy Goddelike wysheid
Mag die Here Sy genade aan julle skenk sodat julle met sagmoedigheid kan lewe.
Mag die Heilige Gees julle versterk om die stryd van die geloof onwankelbaar te veg.
Mag die vrede van God, wat alle verstand te bowe gaan,
julle harte en gedagtes bewaar in Christus Jesus tot Sy wederkoms. AMEN