PREEK SONDAG 12 OKTOBER 2025 I HAVE A DREAM

PREEK 12/10/2025 STAAN OP EN DROOM SAAM MET GOD

Esegiël 37 verse 1 tot 14 “Die mag van die Here het my in besit geneem en my deur die Gees van die Here uitgebring en neergesit binne-in ‘n laagte. Die laagte was vol bene. .. “

GEBED VOOR SKRIFLESING

O Heilige Gees, ons God en Vader. U Hand kom op die profeet Esegiël en neem hom na ‘n plek van absolute doodsheid. Ons weet dat daardie vallei van dorre beendere nie ver van ons eie werklikheid is nie. Ons bid dat U die koue van ons sinisme sal deurbreek en die gloed van U droom in ons harte sal blaas. Maak ons ontvanklik vir U onverwagse lewe. Ons vra dat U ons vandag sal roep om op te staan as ‘n groot leër, toegerus met hoop. AMEN

INLEIDING

Geliefdes in Christus, op 28 Augustus 1963 het Martin Luther King Jr. ‘n visioenêre toespraak gehou. Sy woorde, “I have a dream,” het ‘n magtige appèl geword: ‘n droom van vryheid vir almal, van geregtigheid, en van kinders wat beoordeel word na die inhoud van hul karakter, nie die kleur van hul vel nie. King het gespreek vanuit ‘n plek wat hy die “vallei van wanhoop” genoem het.

Hierdie beeld is die perfekte inleiding tot die teks van Esegiël 37. Die Here neem die profeet na ‘n dal – ‘n landskap van absolute dood. Dis nie ‘n mooi prentjie van ‘n lentetuin nie, maar ‘n massagraf vol dorre, witgebleikte beendere. Hierdie beendere verteenwoordig die volk Israel, wat in ballingskap in Babel sit. Hulle het hulself afgeskryf en gesê: “Ons beendere is verdor. Ons hoop is vervloë. Dit is met ons gedaan”.

Die boodskap is duidelik: beide King en Esegiël het in ‘n dal van wanhoop gestaan. Vir die mens is daar geen oplossing nie; die dorre beendere is hopeloos. Maar in beide gevalle tree God in met ‘n visioen, ‘n droom, wat alle menslike logika oorskry. Ons reis vandag deur hierdie dal om te sien dat wanneer menslike hoop op is, God se ware werk eers begin.

 ONS WOON IN DIE VALLEI VAN WANHOOP

Ons moet die diepte van daardie dal van dorre beendere verstaan. Dit verteenwoordig ‘n finale, onherroeplike dood. Dit is ‘n toestand van “vir ons is dit verlore”. Dit is ‘n situasie wat geen menslike raad, geen politieke ooreenkoms of deesdae ‘deal’, en geen hoeveelheid geld kan oplos nie. Kyk ons na ons eie wêreld vandag, sien ons sulke dorre beendere.

Dink aan die onuitblusbare tragedie van dood en hongerte tussen Israel en Palestina of tussen familie in Soedan. Vir dekades is daar bloedvergieting en haat. Die beendere van elke verlore generasie lê bymekaar, en die situasie voel vir die wêreld so uitgesproke dor dat alle hoop op blywende vrede vervloë is. Mense sê: “Dit kan nie meer verander nie. Dis klaar met ons.”

Dink aan ons eie gemeenskappe wat verskeur word deur dwelmbendegeweld. Kinders wat deur sinnelose skietery sterf. Jongmense wat deur verslawing se greep vernietig word. Die verweerde beendere van gebroke gesinne en vernietigde drome lê in ons strate. Die wanhoop is tasbaar. Ons is geneig om te sê: Die bendeleiers sal altyd wen; die dwelms sal altyd die oorhand kry.

Dit is in hierdie konteks van absolute hopeloosheid dat die Here Esegiël die vraag vra: “Mensekind, kan hierdie beendere leef?”. Esegiël se antwoord is nie ‘n teologiese verhandeling nie; dis ‘n uitroep van totale eerbied: “Here my God, U weet dit!” Hy plaas die antwoord en die krag vierkantig buite homself – ‘n noodsaaklike stap voordat God se droom kan begin.

 DIE WOORD EN GEES SKEP LEWE

Esegiël se visioen leer ons dat God se werk in twee kragtige fases ontvou: die Woord en die Gees.

Eerstens, Die Woord Skep Vorm. God beveel Esegiël: “Profeteer oor hierdie beendere en sê vir hulle: Dorre beendere, hoor die woord van die HERE!” Met die spreek van die Woord gebeur die onmoontlike. ‘n Geruis ontstaan. Die beendere begin beweeg en kom bymekaar. Spiere, vlees en ‘n vel kom oor hulle. Dit word liggame.

Dit is God se werk van herstel van struktuur. God se Woord begin om die chaos van ons dorre beendere te orden. Wanneer ons die Woord spreek oor daardie verdorre plekke in ons lewens – oor gebroke huwelike, oor langdurige hartseer, oor onvergewensgesindheid – begin die struktuur van herstel vorm aanneem.

Maar let wel: nadat die liggame gevorm is, sê die teks: “maar gees was daar nog nie in hulle nie”. Hulle was mooi, perfekte skelette, maar nog steeds dood. Dit wys dat menslike poging, selfs strukturele herstel in die kerk, nie genoeg is nie.

Tweedens, Die Gees Skep Lewe. Daar is ‘n tweede opdrag aan die Gemeente:  “Profeteer tot die Gees… en blaas in hierdie dooies, sodat hulle herlewe”. Die Gees kom van die vier windstreke – dit is ‘n Goddelike ingryping, onbeheerbaar, totaal. En as die Gees kom, staan hulle op. Hulle leef! Hulle word “‘n geweldig groot leër”. Die Woord skep die vorm; die Gees blaas die lewe in.

 STAAN OP EN DROOM SAAM MET GOD

God se visioen is nie net vir Esegiël se tyd nie. Dit is ons opdrag vir ons ook:  Staan op en droom saam met God. Wanneer ons bid vir vrede in Israel en Palestina, of wanneer ons bid vir ons gemeenskappe wat deur dwelms en geweld verskeur is, moet ons onthou dat bid en droom ons kragtigste aksie is.

Droom: Ons moet weier om toe te laat dat die werklikheid van dorre beendere ons visie vergiftig. Martin Luther King jr. het van ‘n toekoms gedroom wat teenstrydig was met sy hede. Ons moet dieselfde doen. Ons moet droom van jongmense wat vrygemaak is van bendegeweld en eerder ‘n groot leër van Christus word. Ons moet droom van twee volke in die Midde-Ooste wat die Lewende God se vrede ervaar.

Staan Op!! Esegiël se visioen lei tot ‘n geweldig groot leër wat opstaan op hul voete. Dit beteken ons word geroep tot aktiewe deelname aan God se herstelwerk. Ons staan nie net en kyk hoe die beendere weer lewe kry nie; ons is die liggame in wie die Gees woon, wat uitgaan met die Woord om ander te help opstaan.

Hierdie oproep is persoonlik. Waar is die dorre beendere in jou lewe? Miskien ‘n harde aggresiewe natuur, ‘n langdurige wrok, of ‘n moedeloosheid wat jou lam lê. Ons moet in daardie plekke die Woord spreek, en met ootmoed bid: “Kom van die vier windstreke af, o Gees, en blaas lewe in my!” Ons Droom is God se Droom van Lewe.

 SAMEVATTING

Geliefdes, die mense in Babel het hulself afgeskryf: Ons hoop is vervloë. Dit is met ons gedaan. Hulle het ‘n selfvervullende profesie geleef. Maar Esegiël se visioen dwing ons om daardie profesie te verwerp en te fokus op die ononderhandelbare waarheid: “Hulle sal weet, dat Ek die HERE is.” God is nie net die God van die moontlike nie; Hy is die God van die onmoontlike! Hy is die Lewende God wat selfs die grafte oopmaak.

Ek droom van vrede in die wêreld.

Ek droom van vrede in streke van konflik.

Ek droom van strate wat vry is van dwelmgeweld.

Ek droom van vergewing waar daar net verbittering was.

Ek droom van broers en susters wat mekaar liefhet.

Ek droom van ‘n kerk wat vol is van God se lewe.

Ek droom van jongmense wat ‘n vlam van die Gees dra.

Ek droom van huwelike wat herleef en groei.

Ek droom van ‘n kerk wat ‘n sterk, helder stem in die samelewing is.

Ek droom van die terugkeer van Jesus Christus.

 Ek droom biddend, want my God is die Lewende God!

AMEN

Gebed Ná Skriflesing

Almagtige God, ons dank U vir U wonderlike droom in Esegiël 37. Ons bely ons onvermoë en ons neiging tot wanhoop. Ons het gesien dat ons dorre beendere is, maar ons het gehoor dat U die bron van alle lewe is. Ons vra U: Profeteer oor ons. Spreek U Woord oor ons dooie situasies. Stuur U Gees, o Gees van die vier windstreke, om krag en geesdrif in ons te blaas. Maak ons U geweldig groot leër. Mag ons nooit ophou om die lewe te verwag wat slegs U kan gee nie. Mag ons daardie Droom van U elke dag uitleef tot U eer. AMEN

SEËNBEDE

Die genade van ons Here Jesus Christus, wat opgestaan het uit die dood; Die liefde van God die Vader, die Skepper van alle lewe; En die gemeenskap van die Heilige Gees, wat die asem in die dorre beendere blaas; sal by julle wees en bly, vandag en vir ewig. AMEN