DAGSTUKKIES SATERDAG 24 MEI 2025: WEES STERK EN VOL MOED!

SATERDAG 24/5/2025:  EMOSIONELE MOED

1 Samuel 1–2 : “… Dan het die ander vrou haar baie gespot en verneder omdat die Here haar kinderloos laat bly het. So het dit jaar vir jaar gegaan: elke keer as Hanna in die huis van die Here gaan offer het, het Peninna haar gespot, sodat sy gehuil het en nie wou eet nie. Dan sê haar man Elkana vir haar: “Hanna, waarom huil jy? Waarom eet jy nie en waarom is jy hartseer?…”

Inleiding

Emosionele moed is die bereidheid om eerlik jou gevoelens toe te laat – om pyn, vrees, teleurstelling en onsekerheid toe te laat sonder om daarvan weg te hardloop. Dit beteken om jou emosies te herken, te erken en daardeur te gaan sonder om dit te onderdruk of te vermy. Emosionele moed is die krag om jou hart oop te maak vir die pynlike realiteite van die lewe terwyl jy steeds kies om volgens jou waardes op te tree. Dit is nie die afwesigheid van emosie nie, maar die teenwoordigheid van volharding te midde van emosie.

Bybelse Konteks

Die verhaal van Hanna in 1 Samuel is ’n goeie voorbeeld van emosionele moed. Hanna was kinderloos, en jaar na jaar moes sy die gespot en vernedering van haar medevrou Peninna verduur. Peninna het haar geboelie en getreiter het oor haar onvermoë om kinders te hê. Die sosiale druk, persoonlike verlange en gevoel van mislukking het haar hartseer en gebroke gemaak. Sy het gehuil, haar eetlus verloor, en selfs haar man se liefdevolle woorde het haar nie getroos nie.

In haar bitterheid en hartseer het sy nie haar emosies onderdruk nie – sy het dit aan God toe vertrou. Sy het haar hele hart in gebed uitgegiet, so intens dat Eli, die priester, aanvanklik gedink het sy was dronk. Maar deur gebed vind sy rustigheid en innerlike herstel. Nog voor haar omstandighede verander, sê die teks: “sy was nie meer mismoedig nie” (1 Samuel 1:18).

Uiteindelik gee God haar ‘n seun, Samuel, maar dit is belangrik om te sien dat haar vrede nie eers ná die seun gekom het nie – dit het gekom toe sy haar emosionele pyn met volle vertroue aan God oorgegee het.

Toepassing

Daar is baie mense wat dink moed beteken om sterk te wees en nie te huil nie, party spog eintlik met hul ‘vermöe’ om emosies te toon. Maar werklike emosionele moed is om toe te laat dat jy voel wat jy voel, en steeds aan te beweeg. In ’n wêreld waar ons leer om ons gevoelens te onderdruk of weg te redeneer, is dit dapper om eerlik te wees oor pyn, hartseer en teleurstelling.

Dis maklik om emosie te vermy – ons raak besig, ons verdrink onsself in werk, vermaak, lekker kos of selfs in oppervlakkige spiritualiteit. Maar as ons nie ons emosies in die oë kyk nie, word hulle sterker – wat sielkundiges “amplifikasie” noem. Emosies wat ons ignoreer, keer terug met meer intensiteit, dikwels op ongesonde wyses.

Emosionele moed beteken om in tye van verlies, verwerping of mislukking nie toe te laat dat vrees of pyn jou stilmaak of laat onttrek van die samelewing nie. Dit beteken om te sê: “Ek is bang, maar ek sal tog bid.” Dit beteken om te huil én om hoop vas te hou.

Wanneer jy soos Hanna voel – leeg, alleen, en deur pyn oorweldig – weet dat God nie net jou gebede hoor nie, maar ook jou trane verstaan. Jy hoef nie heel en sterk te wees om tot Hom te kom nie. Jy mag gebroke wees, en tog vol geloof. Emosionele moed gee jou die vrymoedigheid om jouself te wees – volledig, rou, en eerlik – voor God.

Samevatting

Emosionele moed is nie ‘n teken van swakheid nie, maar van geestelike volwassenheid. Dit is die moed om pyn te voel, dit te verwerk, en steeds te kies om te leef en te glo. Hanna se verhaal wys dat God ons nie wegstoot in ons seer nie – Hy nooi ons in.

Wanneer ons soos Hanna ons emosies eerlik voor God bring, ontdek ons dat ons emosionele sterkte nie van onsself kom nie, maar van Sy teenwoordigheid. Ware emosionele moed word nie gemeet aan hoe min jy voel nie, maar aan hoe diep jy leef en hoe eerlik jy jou hart by God uitstort.

Twee WENKE

1. Jy hoef nie al jou emosies te verstaan om dit te erken nie – bring dit soos dit is na God.
2. Emosionele moed beteken om jouself te laat voel, en tog op te daag met geloof, waarheid en hoop.

GEBED Here, dankie dat ek nie my gevoelens hoef weg te steek vir U nie. Leer my om dapper genoeg te wees om eerlik te voel, en moedig genoeg om dit aan U toe te vertrou. Vul my hart met U vrede, selfs voordat my omstandighede verander. AMEN

Emosionele moed is om sag te wees in ’n harde wêreld, om pyn te voel en steeds lief te hê, om trane te stort en tog op te staan.