LENT 40 daetyd – Dag 33
Skriflesing: “ Vader, ek het gesondig teen die hemel en voor u en ek is nie meer werd om u seun genoem te word nie.” Lukas 15: 21
Sy uitgeputte voorkoms, verslete skoene en gewonde kop herinner ons aan die swaarkry en vernedering wat hy ervaar het. Die rooi mantel, al is dit verslete, is ‘n simbool van sy verlede en identiteit, ‘n herinnering aan die vryheid wat hy verloor het en die modderput waarin hy gedaal het.
Die jongste seun lê gekniel op ‘n klipagtige ondergrond, ‘n simbool van sy gebrokeheid, nederigheid en oorgawe. Sy posisie onderaan die skildery, terwyl die oudste seun op ’n verhoog staan, dui op ‘n gebrek aan status en waardigheid. Maar selfs in sy vernedering, sien ons ‘n uitdrukking van berou en hoop op versoening.
Laat ons in hierdie tyd van LENT refleksie onsself vra: hoe dikwels ervaar ons die gevoel van vernedering en verlies van identiteit? Hoe dikwels voel ons nie ook dat ons ’n onvergeefbare sonde gepleeg het nie en dat ons verdien om verwerp te word. Hoe kan ons, soos die jongste seun, ‘n pad van berou en herstel vind deur totale oorgawe aan God se genade en vergifnis?
Gebed: Liewe God, ons erken die swaarkry en vernedering wat ons soms in die lewe ervaar. Help ons om onsself in u liefdevolle teenwoordigheid met nederigheid oor te gee en om die pad van berou en herstel te loop. Amen.
Refleksievrae:
- Op watter maniere kan jy jou identifiseer met die jongste seun se ervaring van vernedering en verlies?
- Hoe kan ons, soos die jongste seun, ‘n pad van berou en herstel vind deur oorgawe aan God se genade?
- Wat kan ons leer uit die posisie en houding van die jongste seun in die skildery, en hoe kan dit ons help om ‘n beterr begrip van berou en vergifnis te kry?