PREEK SONDAG 9 MAART 2025 – VOLTOOI DIE GELOOFS MARATHON
HEBREËRS 12 : “…..Daarom, rig die slap hande en die verlamde knieë weer op; en maak reguit paaie vir julle voete, sodat wat kreupel is, nie uit lit raak nie, maar liewer gesond gemaak word. Jaag die vrede na met almal, en die heiligmaking waarsonder niemand die Here sal sien nie; …”
Liewe bloglesers in Christus, Soms hoor ons dinge wat ons net nie kan verdra nie. Iemand sê, “leermoment!” net nadat ons ‘n fout gemaak het. Of iemand noem ‘n probleem ‘n uitdaging. Dit voel soms vergesog of cliché-agtig, maar daar is ‘n waarheid daarin: hoe ons iets sien, bepaal hoe ons daarop reageer.
Die skrywer van Hebreeërs skryf aan mense wat moeg en moedeloos is. Hulle het gely onder vervolging en was op die punt om op te gee. Maar hy moedig hulle aan: “Hou vol, dit is ‘n leerskool!” en “Hardloop met volharding die wedloop wat voor ons lê.” Hy sien geloof nie as iets maklike nie, maar as ‘n uitdaging – ‘n marathon om te voltooi.
Die uitdaging van die geloof – verlede en hede
Vir die gelowiges van destyds was die probleem duidelik: hulle is vervolg vir hul geloof. Dit het vir hulle swaar geraak om Jesus te bly volg, van hulle het afvafvallig geword. Ons leef in ander omstandighede, maar ons het ons eie uitdagings. Soms raak ons geloof moeg en mat. Ons bid minder, woon eredienste minder gereeld by, en begin twyfel aan God se teenwoordigheid.
Die skrywer van Hebreeërs waarsku: moenie verslap nie! Moenie toelaat dat die wêreld en sy uitdagings jou van jou geloofspad aftrek nie. Dit is ‘n wedloop en dit vra inspanning. Soos die atlete van destyds hul klere afgeskud het om vinniger te hardloop, moet ons ook alles afgooi wat ons hinder.
Gelowig wees is nie maklik nie
Om ‘n lewe van geloof te leef is nie ‘n maklike pad nie. Jesus self het gely en versoekings weerstaan. As ons nooit sukkel met ons geloof nie, kan ons vra: “Is ek regtig in die wedloop?” Ware geloof vra deursettingsvermoë. Dit is nie net om te glo dat God lief is vir ons en alles sal uitwerk nie, maar om ons lewens aan Hom te wy.
Die skrywer herinner ons: “Julle het nog nie tot die dood toe weerstand gebied in julle stryd teen die sonde nie.” Dit is ‘n skerp teregwysing dat ons teen sonde moet veg en op die Here moet vertrou. As ons nooit moeilikheid ervaar in ons geloofsreis nie, beteken dit dalk dat ons nie regtig die wedloop hardloop nie.
Gaan vir geloof – Jesus as Voorloper
Die goeie nuus is: ons hoef dit nie alleen te doen nie! Die skrywer van Hebreeërs moedig ons aan om ons oë op Jesus te rig, die “grondlegger en voltooier van ons geloof”. Hy het die pad vir ons voorberei. Ons krag kom van Hom.
Wanneer ons moeg en moedeloos voel, moet ons terugkyk na Jesus se lewe. Hy het volgehou, ten spyte van lyding en vernedering. Hy het gesterf en opgestaan, en Hy loop saam met ons. Dit is nie net ons eie inspanning wat ons oor die wenstreep bring nie – dit is Jesus wat ons help volhard.
SAMEVATTING
Bloglesers die oproep is duidelik: hardloop die wedloop van geloof met vasberadenheid! Dit gaan nie altyd maklik wees nie, maar dit is die moeite werd. Soos met ‘n langafstandwedloop, kry jy eers energie sodra jy begin beweeg. Miskien is jy moeg en afgemat – maar kom in beweging! Gee jou lewe oor aan God, laat los wat jou verhinder, en fokus op Jesus. Vermy alle struikelblokke wat jou vertraag in jou geloofsreis. Laat ons oë altyd gerig wees op Jesus, ons Voorloper en Voorbeld van ons geloof AMEN
GEBED Hemelse Vader, Dankie dat U ons roep om die wedloop van geloof te hardloop. Ons bely dat ons soms moeg raak en ons fokus verloor. Here, gee ons krag en volharding. Help ons om te laat los wat ons vashou.. Dankie dat U ons nooit alleen laat nie. Vul ons met u Gees sodat ons met moed en ywer kan volhard. Ons vra dit in die Naam van Jesus Christus. AMEN
SEËNWENS: Mag die Here jou seën en bewaar. Mag Sy lig oor jou skyn en jou vrede gee. Mag Hy jou hart vul met moed en jou voete sterk maak op die pad van geloof. Gaan in Sy krag en volhard tot die einde toe. AMEN