40 DAE PAASSONDAG TOT HEMELVAART
SATERDAG 27 APRIL 2024
Johannes 21 vers 25: “Daar is nog baie ander dinge wat Jesus gedoen het. Maar as dit een vir een beskrywe moet word, dink ek, sou die hele wêreld nie genoeg plek vir die boeke hê nie.”
Die tydperk tussen die opstanding en die hemelvaart van Jesus is ‘n tyd van verwagting en hoop. Die dissipels bevind hulself in Jerusalem, wagtend op die vervulling van Jesus se belofte van die Heilige Gees. Vir ons is dit ‘n herinnering dat selfs in die donkerste oomblikke van ons lewe, daar ‘n lig van hoop is wat op die horison skyn. Ja, môre sal die son weer skyn, miswolke sal verdwyn. Die Gees van God sal kom om ons bestaan te hernu en ons harte te vervul met nuwe liefde en verwagting. In hierdie tydperk tussen opstanding en hemelvaart, roep ons na die Heilige Gees om ons lewens te hervorm en ons hoop te vernuwe.
In ons gemeenskappe en kerke is daar ‘n behoefte aan die werking van die Heilige Gees om lewe en geesdrif te bring. Ons bid vir die koms van die Gees van Jesus, wat ons lewens kan vernuwe en ons gemeenskappe kan transformeer. Dit is ‘n tyd van herlewing en begeestering, waar ons smag na die aanwesigheid en krag van God in ons midde. Mag die Gees van Jesus, wat ons so desperaat nodig het, oplaai in ons wanhopige wêreld soos ‘n lentewind, wat nuwe lewe en hoop bring waar dit nodig is.
Gebed: Hemelse Vader, ons roep uit na die koms van U Heilige Gees om ons harte te hernu en ons gemeenskappe te transformeer. Bring U Gees van begeestering en lewe in ons midde, en herstel die hoop en verwagting wat ons verloor het. Mag U Gees waai soos ‘n lentewind, wat nuwe lewe bring waar daar dood is, en nuwe hoop bring waar daar wanhoop is. Amen.