MAANDAG 10 FEBRUARIE 2025 – ERKEN JOU PYN EN VERDRIET
ESTER 4 VERSE 1 & 2 “TOE Mórdegai verneem alles wat gebeur het, het Mórdegai sy klere geskeur en ‘n roukleed aangetrek, en daar was as op sy hoof; en hy het uitgegaan dwarsdeur die stad en hardop en bitter geskreeu. So het hy dan tot voor die poort van die koning gekom; want niemand het met ‘n roukleed aan by die poort van die koning mag ingaan nie.”
Die uitdrukking in sak en as sit dui op ’n toestand van wanhoop en hartseer, wanneer dit voel asof alles verlore is en geen uitkoms moontlik is nie. Hierdie beeld kom uit die Bybel, waar mense in tye van groot verlies hul koppe met as bestrooi het en growwe sakke gedra het as simbool van hul rou en berou. In ons teks lees ons hoe Mordegai sy klere skeur en homself in sak en as hul om sy pyn en die dreigende vernietiging van sy volk uit te druk. Sy daad herinner ons daaraan om ons eie pyn te erken en nie ons emosies te onderdruk nie, maar dit eerlik in die oë te kyk.
Wanneer Mordegai verneem van die koninklike bevel om die Jode uit te roei, is sy reaksie een van diep rou. Hy skeur sy klere ’n tradisionele teken van nood en trek ’n sak aan, terwyl hy sy verdriet uitroep vir almal om te hoor. Hierdie openbare daad was nie net ’n persoonlike uitdrukking van hartseer nie, maar ’n oproep om die gemeenskap bewus te maak van die bedreiging wat oor hulle hang.
In Bybelse tye was rou in sak en as ’n manier om emosionele pyn te erken en dit in God se hande oor te gee. Dieselfde patroon sien ons in die lewe van Job, wat sy ellende erken het en met God gestry het oor sy lyding. Hierdie eerlike uitdrukking van emosie is deel van ’n gesonde genesingsproses. Selfs Jesus het in Gethsémané gehuil en gebid in sy pyn oor wat voorlê (Lukas 22:44).
In vandag se tyd is ons dikwels geneig om ons pyn te verberg en ’n masker van sterkte op te sit. Maar genesing begin wanneer ons ons pyn erken en toelaat dat ander ons ondersteun. Verdriet verwerk is nie ’n teken van swakheid nie, maar ’n moedige stap na herstel. Moderne sielkunde bevestig dat om gevoelens van hartseer en verlies te onderdruk, kan lei tot langtermyn-emosionele skade soos depressie of angs.
Daarom is dit belangrik om te erken wanneer ons hartseer is. Vind iemand wat jy vertrou … ’n vriend, familielid of selfs ’n terapeut en deel jou gevoelens met hulle. Ons is nie gemaak om ons swaarkry alleen te dra nie.
Lewenswenke
Erken jou gevoelens: Laat jouself toe om jou hartseer eerlik te ervaar. Onderdrukking vertraag genesing.
Soek ondersteuning: Praat met geliefdes of ‘n professionele persoon. Jy hoef nie alleen te wees in jou pyn nie.
GEBED Here, U ken my pyn en hartseer. Help my om my emosies eerlik te erken en te deel met ander. Wees my troos en my sterkte in hierdie tyd van swaarkry. Lei my tot genesing en herstel. AMEN