PREEK 29 DESEMBER 2024 : DIE VERGANKLIKHEID VAN DIE MENS
PSALM 90
INLEIDING
Ons staan op die drumpel van ’n nuwe jaar. Vandag is ’n tyd van nadenke oor wat verby is. Dit is ook ’n dag waarop ek persoonlik reflekteer, aangesien dit (29 Des) my 63ste verjaardag is. Op ’n dag soos hierdie besef ’n mens die verloop van tyd en die verganklikheid van die lewe meer intens. Laat ons daarom vandag nadink oor die tema van “verganklikheid” en hoe God ons in ons broosheid ’n toevlug bied.
DIE VERGANKLIKHEID VAN DIE MENS
Ons teks herinner ons aan eie broosheid:
“U laat die mens weer tot stof terugkeer. Seventig jaar duur ons dae, of tagtig as ons sterk is; maar die beste daarvan is moeite en leed, dit gaan gou verby en ons vlieg heen.”
Die psalm teken ’n eerlike maar kras prent van menslike verganklikheid. Ons lewens is kort en ons tyd beperk. Dit is ’n realiteit waarmee ons elke dag gekonfronteer word. Die oujaar, met sy herinneringe aan wat verlore is, beklemtoon hierdie waarheid. Vir sommige van ons was dit ’n jaar van hartseer, verlies, en selfs die dood van geliefdes. Ander voel dalk dat die dae leeg en sinloos verbygaan.
Maar wat beteken dit alles? Is ons bestaan net ‘n sirkel van verganklikheid en vergeefsheid? Die psalmdigter vra dieselfde vraag. Hy worstel met die sinloosheid van die lewe, maar hy vind sy antwoord by God.
“Here, U was vir ons ’n toevlug van geslag tot geslag.” Hierdie woorde staan sentraal in Psalm 90. Die digter begin nie met menslike nietigheid nie, maar met God se getrouheid. God is die Skepper van die hemele en die aarde, Hy is die Een wat alles in sy hand hou.
Om God as toevlug te hê, is om ’n veilige plek te hê in die storms van die lewe. Soos ’n fort wat beskerm teen gevare, is God ’n plek van rus en sekuriteit. Hierdie toevlug is nie net teoreties nie, maar prakties en persoonlik. Wanneer ons worstel met die onsekerhede en verganklikheid van die lewe, is dit God wat ons dra en ons vertroos. Psalm 90 herinner ons: Ons is broos, maar ons is nie alleen nie. God is ons toevlug, nie net vir hierdie lewe nie, maar ook vir die ewigheid.
DIE OORSAAK VAN VERGANKLIKHEID: ONS GEBROKENHEID
Die psalm maak ook die rede vir ons verganklikheid duidelik: “U het ons sondes voor U gehou, ons geheime sonde in die lig van u aangesig.” Die gebrokenheid en verganklikheid van die mens is nie net toevallig nie; dit is die gevolg van die sonde. Paulus skryf in Romeine 6:23: “Die loon van die sonde is die dood.” Ons gebrokenheid bring skeiding tussen ons en God. Maar die goeie nuus is dat hierdie skeiding nie finaal is nie. God het ons nie aan ons lot oorgelaat nie. Hy het ingegryp in die geskiedenis deur Jesus Christus. Jesus het ons sonde op Hom geneem en die dood oorwin. Hy het ons versoen met God, sodat ons nou vrymoedig na Hom kan gaan. Wat beteken hierdie waarheid vir ons vandag? Hoe help dit ons om te leef in die lig van ons verganklikheid? “Leer ons om ons dae so te tel dat ons ’n wyse hart mag bekom.” Ons is verganklik, maar elke dag wat God ons gee, is ’n gawe. Om ons dae te tel, beteken om te leef met doelgerigtheid, om ons tyd wys te gebruik, en om dankbaar te wees vir elke oomblik. Vandag, op my 63ste verjaardag, dink ek aan hoe kosbaar elke jaar is. Elke dag is ’n geleentheid om God se liefde te ervaar, om liefde uit te deel, en om die lewe voluit te leef.
LEEF MET HOOP
Psalm 90 eindig met ’n gebed wat ons hoop gee: “Laat die goedheid van die Here ons God oor ons wees. Bevestig die werk van ons hande, ja, bevestig die werk van ons hande!” Ons lewens het betekenis, nie omdat ons self groot dinge bereik nie, maar omdat God ons werk bevestig. Wanneer ons in gehoorsaamheid aan Hom leef, maak Hy selfs ons kleinste pogings betekenisvol.
Jesus sê in Johannes 14:1-3:
“Moenie ontsteld wees nie. Glo in God, en glo in My. In die huis van my Vader is daar baie wonings… Ek gaan om vir julle plek gereed te maak.” Hierdie belofte herinner ons dat die dood nie die einde is nie. Ons is verganklik, maar ons hoop lê in God se ewige beloftes. Hy maak alles nuut.
Vandag staan ons op die drumpel van ’n nuwe jaar. Ons kyk terug op die afgelope jaar met sy seëninge en sy uitdagings. Maar ons kyk ook vorentoe, vol hoop en verwagting. Ons verganklikheid hoef ons nie te verlam nie. Dit is eerder ’n uitnodiging om ons lewens doelgerig, dankbaar, en in afhanklikheid van God te leef.
SAMEVATTING
Soek jou toevlug by God. Begin en eindig elke dag by Hom. Laat Hy jou krag en moed gee, selfs wanneer die dae donker is. Leef in die lig van sy genade, en weet dat Hy jou nooit sal los nie. “Here, U was ons toevlug van geslag tot geslag.” Met hierdie woorde kan ons die jaar afsluit en die nuwe jaar met geloof en vertroue binnegaan. Mag God ons lei, dra, en seën in alles wat voorlê. AMEN.
GEBED
Liewe Hemelse Vader, Ons kom vanaand in dankbaarheid en nederigheid na U toe. U is ons toevlug van geslag tot geslag, die Skepper van hemel en aarde, en die Een wat ons lewens in u hand hou. Here, ons staan aan die einde van hierdie jaar, bewus van ons eie verganklikheid en broosheid. Tog dank ons U dat U ons deur hierdie jaar gedra het – deur die uitdagings en hartseer, maar ook deur die seëninge en vreugdes. U was getrou, Here, en ons loof u Naam.
Help ons om ons dae te tel, sodat ons ’n wyse hart kan bekom. Leer ons om met dankbaarheid te leef, om liefde te gee, en om elke oomblik as ’n gawe uit u hand te aanvaar. Mag ons in die nuwe jaar nader aan U leef, U meer vertrou, en u wil met oorgawe volg.
Vader, ons bid vir almal wat swaar kry. Mag U hulle troos in hul hartseer, versterk in hul swakheid, en vul met u vrede wat alle verstand te bowe gaan. Ons plaas ons lewens, ons geliefdes, en hierdie komende jaar in u hande. Lei ons, Here, en wees ons toevlug in alles wat voorlê. Ons bid dit in die Naam van Jesus Christus, ons Verlosser. AMEN
Seënbede
Die Here seën julle en beskerm julle.
Die Here skyn sy aangesig oor julle skyn en sal julle genadig wees.
Die Here wend sy aangesig na julle en gee julle vrede. AMEN