Oordenking: LENT 40 dae – 40ste
Skriflesing: “Aan hulle vrugte sal julle hulle ken. Kry ‘n mens dan druiwe aan doringstruike of vye aan dissels?” MATTEUS 7:16
Die Lent bied ‘n geleentheid vir Christene om te besin oor hulle rol in die politieke arena, ook in Suid-Afrika. Ons moet onthou dat alle Christene in die politiek betrokke is, selfs wanneer hulle dit nie besef nie. Al stem jy nie en jy betaal belasting of BTW of jy ry deur ‘n ‘pothole’ en skel, is dit politiek. Ons glo in ‘n God wat passievol omgee vir Sy wêreld en sy skepping, en dus God gee om oor hoe Suid Afrika bestuur word. Die Bybel is uiters politiek omdat dit gaan oor hoe God wil hê mense teenoor Hom en teenoor mekaar moet optree. Dit behels ekonomie, dienslewering en gereghowe omdat hierdie instrumente gebruik moet word om geregtigheid op te bou.
In Suid Afrika sien ons dikwels onreg wat God se hart bedroef. As gelowiges in God, het ons baie om die politiek te bied. Ons kan nie passief (stil sit nie) wees nie; ons moet ons stemme laat hoor en ons invloed aanwend om geregtigheid en welvaart na vore te bring. Ons kan ‘n verskil maak in die politieke arena deur ons Christelike waardes en beginsels te beliggaam en te bevorder.
Gebed:
Here, ons bid dat ons as Christene ons rol in die politiek sal verstaan en waardeer, veral in ‘n tyd van verkiesings. Mag ons strewe na geregtigheid en vrede in ons land, en mag ons optree in ooreenstemming met U wil en U liefde. Gee ons wysheid en leiding om die regte keuses te maak en om ‘n positiewe verskil te maak in die samelewing. Amen.
Refleksievrae:
- Op watter maniere kan Christene aktief betrokke raak by die politieke proses?
- Hoe kan ons ons Christelike waardes en beginsels bevorder in die politieke arena?
- Wat is ons verantwoordelikhede as Christene in die beskerming van geregtigheid en vrede in ons samelewing?