PRIESTERLIKE SEËNBEDE (7)
OORDENKING SATERDAG 22 JUNIE 2024
Numeri 6 Verse 24-26: “Die Here sal julle seën en julle beskerm; Die Here Sal Sy Aangesig julle lig, en julle genadig wees; die Here sal julle gebede verhoor en aan julle vrede gee!”
Die afsluitende seën, “en gee aan jou vrede.” Die Hebreeuse woord wat hier gebruik word, is “shalom.” Hierdie woord het ’n MEERSEGGENDE betekenis as net ‘n gevoel van rus. Shalom dui op ‘n staat van volmaaktheid, perfektheid, gesondheid, en welstand. Dit verwys na ‘n sekerheid, stewigheid, en sterkte van liggaam en gees. Verder beteken shalom vrede, rus, en tevredenheid. Dit sluit ook vrede en vriendskap in, beide in intermenslike verhoudings sowel as in ons verhouding met God, veral in die konteks van sy verbond. Shalom is ‘n alomvattende begrip wat die volle omvang van God se seën en voorspoed insluit.
Wie sou nie hierdie tipe vrede wil hê nie? Hierdie vrede is nie net die afwesigheid van konflik nie, maar ‘n allesomvattende toestand van welstand en harmonie wat deur God self aan ons gegee word.
Die seën begin met die Here en eindig met vrede. Dit herinner ons aan die grootse werk van versoening wat God vir ons gedoen het. Voorheen was ons in stryd met God, in duisternis, maar deur sy genade het Hy ons na Hom toe getrek en ons met Hom versoen. Dit is nie net ‘n vae hoop nie, maar ‘n sekerheid. God wil vir ons hierdie vrede gee. Hy is die Almagtige, die Heilige God, en Hy is die Een wat ons vergewe en ons Syne maak. Hierdie vrede is ‘n refleksie van ons nuwe verhouding met God, ‘n verhouding wat gebou is op die fondament van versoening en genade.
GEBED: Liewe Hemelse Vader, Dankie vir die wonderlike seën van vrede wat U oor ons uitspreek. Dankie vir die besondere betekenis van shalom, ‘n vrede wat volmaaktheid, gesondheid, en welstand insluit. Dankie dat U ons versoen het met U self, deur Jesus Christus, ons Here. Ons was eens in stryd met U, maar nou leef ons in die lig van U genade en liefde. Help ons om hierdie vrede in ons lewens te ervaar en uit te leef. Mag ons rus en tevredenheid vind in U teenwoordigheid. Mag ons vrede hê in ons verhoudings met ander en in ons verhouding met U. Gee aan ons die sekerheid en vastigheid wat kom van U shalom. Here, laat ons nooit vergeet dat hierdie vrede kom van U, die Almagtige God, wat ons vergewe het en ons Syne gemaak het. Bewaar ons, lei ons, en vul ons met U vrede elke dag. In Jesus se Naam bid ons, AMEN.