OORDENKING REEKS OOR MOEGHEID
WOENSDAG 26 JUNIE 2024
JESAJA 40 VERS 30: “Die jonges word moeg en mat, en die jongmanne (en vroue) struikel selfs;….”
Ek is so moeg,
selfs my moeg is moeg
In ons veel na uitgesiene vrye tyd vind ons dikwels dat ons net nog meer uitgeput is. Die vele geleenthede om te “ontspan” en die inspanning wat daarmee gepaard gaan, maak ons net moeg. Of dit nou Maandag of Vrydag is, die begin of einde van die week, dit maak geen verskil nie. Selfs Saterdae en Sondae, wat bedoel is vir rus, het werksdae geword. Hierdie konstante gevoel van moegheid, selfs na ‘n vakansie, is iets waarmee baie van ons worstel. Ons is moeg na die werkweek, moeg na die naweek, moeg na die vakansie. Die voortdurende slawerny, bekommernis, en die stryd teen onreg laat ons uitgeput voel. Dit voel soms asof daar geen einde aan kom nie. Hierdie moegheid is ‘n groot struikelblok in ons lewens.
Ons teks herinner ons dat ons krag en herstel by God lê. Al is ons moeg, selfs na ‘n vakansie, kan God ons nuwe krag gee. Hy is die ewige bron van krag wat nooit uitgeput raak nie.
GEBED: Here, ons kom na U in ons moegheid en vra vir U krag. Die laste van die lewe maak ons dikwels uitgeput, selfs in ons vakansietye. Help ons om op U te wag en ons hoop op U te plaas. Gee ons die krag om voort te gaan en die lewe met nuwe energie en moed aan te pak. Laat ons soos arende opstyg, vol van U krag en genade. Dankie dat U ons altyd ondersteun en ons nooit sal laat vaar nie. In Jesus se Naam bid ons dit. AMEN