SALIG IS DIE VREDEMAKERS
Maandag 1 JULIE 2024
MATTEUS 5 VERS 9: “Salig is die vredemakers, want hulle sal kinders van God genoem word.”
In families ontstaan daar soms jarelange rusies en vetes oor geld, verhoudings en woorde wat wel of nie gesê is nie. Hierdie konflikte raak ons tot is ons siel, hou ons besig, en steel baie energie. Dit kan so uitputtend wees om te probeer om die regte ding te doen, maar telkens misluk. Die pyn wat uit hierdie stryd kom, kan oorweldigend wees. Gelukkig is daar die kerk, die liggaam van Christus, wat ons elke week herinner aan God se liefde en die oproep om ons naaste lief te hê. Elke Sondag hoor ons die bemoedigende woorde: “Vrede sy met julle almal.” Hierdie seën herinner ons aan die vrede wat God ons gee, maar selfs binne die kerk ontstaan daar konflikte.
Ons hoor soms dat kerke verdeeld is, mense teenoor mekaar staan, en dat gelowiges gefrustreerd of oorlaai raak deur gestryery en kritiese gesindhede. Konflikte kan ontstaan oor geld, verhoudings, gedrag en leerstellings. Dit is hartseer om te sien hoe die plek wat vrede en liefde moet wees, dikwels self ‘n terrein van stryd word. Soos ‘n jonger lidmaat eenkeer gesê het: “Dit is tog net stryd in die kerke.” Hierdie woorde is ‘n pynlike herinnering dat ons as Christene geroep is om vredemakers te wees, soos Jesus ons geleer ….
ADVIES
Wanneer daar ‘n konflik dreig, het ons die neiging om dit te vermy omdat dit ons ongemaklik laat voel. Hierdie terughoudendheid is verstaanbaar, maar nie altyd verstandig nie. Konflikte wat ons ignoreer, keer gewoonlik terug, maar dan op ‘n meer intense manier. Dit is belangrik om konflikte te herken en te erken, sodat ons dit kan oplos. Dit vereis dat ons duidelik verstaan wat die konflik veroorsaak en die moed het om te praat daaroor. Om ‘n oplossing te vind, moet ons die konflik skerp in beeld kry en ‘n antwoord soek op die vraag wat presies aan die gang is.
GEBED: Liewe JESUS, Dankie dat U ons die vrede en wysheid gee om konflikte te hanteer. Help ons om nie konflik te vermy nie, maar om dit met moed en liefde te benader. Gee ons die insig om konflikte te erken en die wysheid om dit op te los op ‘n manier wat U eer. Mag ons ware vredemakers wees, soos Jesus ons geleer het, en U vrede en liefde weerspieël in ons families en gemeentes. Seën ons met U rustigheid en krag, sodat ons die strydbyl kan begrawe en na ware harmonie kan strewe. In Jesus se Naam bid ons, AMEN.