PASTORALE OORDENKING ANGS (2)
S0NDAG 2 JUNIE 2024
JESAJA 41 VERS 10 : ” Moenie bang wees nie, Ek is by jou, moenie bekommerd wees nie, Ek is jou God. Ek versterk jou, Ek help jou, Ek hou jou vas, met my eie hand red Ek jou.”
Hierdie teks herinner ons daaraan dat ons geloof oor ons angs kan uitstyg as ons ons op God rig. Hy is ‘n liefdevolle Vader wat ons wil help om ons bestemming te bereik. Wanneer ons uitdagings in die lewe in die gesig staar, of wanneer ons ‘n preek hoor of bemoediging van iemand ontvang, kan ons ons harte oopstel en vra: “Heer, wat wil U hierdeur sê?” Soos Samuël in 1 Samuël 3:10 gesê het: “Spreek Heer, want ek luister.” Ons moet nie net hoor wat God sê nie, maar ook gehoorsaam wees aan Sy Woord.
God wil Sy liefde aan ons openbaar en ons wys wat Hy in en deur ons kan doen. Daar mag tye wees wanneer ons oorweldig word deur angs, of dit nou deur omstandighede, ander se opinies, of die vrees vir die onbekende is. Hoe oorwin ons daardie angs? Nie deur te veg teen die angs nie, want dit maak dit net groter. Nee, ons moet vir die liefde veg! Neem tyd om by jou hemelse Vader te sit en Sy liefde te ontvang. Wanneer ons fokus op wat Hy reeds gedoen het eerder as op wat ons moet doen, vind ons vrede. Lees en spreek God se Woord totdat dit jou eie woorde word en handel daarvolgens. Deur in geloof te wandel, sal ons sien hoe hierdie geloof ons help om oor ons angs heen te kyk en in vertroue en sekerheid te leef.
GEBED: Hemelse Vader, dankie dat U altyd by ons is en dat U ons sterkte en hulp is. Ons kom na U met ons vrese en angste, en ons vra dat U ons sal help om ons oë op U te rig. Help ons om U liefde te ontvang en ons fokus te verskuif van ons eie pogings na wat U reeds gedoen het. Gee ons die moed om U Woord te lees, te spreek en daarvolgens te handel. Mag ons geloof sterk wees en ons help om oor ons angs heen te kyk. In Jesus se Naam bid ons, AMEN.