29 DESEMBER 2025: OBÉ – 64 NIE UIT NIE!

Obé aka OUBAAS PHILLIPS – 64 NIE UIT NIE

Liewe vriende en bloglesers, Vandag vier ek my 64ste verjaarsdag. In krieketterme: I am 64 not out. Deur die genade van God beskerm ek nog steeds my paaltjies, en ek hoop om nog lank by die ‘crease’ te staan. Ek sê dit met ’n glimlag, maar ook met diep erns: dit is ’n groot geskenk om eenvoudig lewendig te wees. Tyd is nie net iets wat verbygaan nie; dit is iets wat aan jou toevertrou word.

Vandag voel ek ’n diep dankbaarheid vir die eenvoudige geskenk van lewe en tyd. Aan my vrou, Nanine: jy is my rots, my “pillar of strength”. Sonder jou sou hierdie beurt baie korter gewees het. Nanine is my pilaar van krag—my rustige anker wanneer my wêreld wankel, my hand wanneer ek moeg raak.

Die beroertes van meer as drie jaar gelede het my ’n nuwe perspektief gegee op lewe en dood. Ek begin uiteindelik verstaan wat werklik saak maak.

Vandag kyk ek met ’n dankbare hart na die horison. Die beroertes van drie jaar gelede het my kyk op die lewe vir goed verander. Ek verstaan nou amper wat werklik saak maak. Die afgelope jaar was een van my beste jare ooit, en wel om ’n baie besondere rede: ek het openlik om vergifnis gevra vir my foute en oortredings.

Die bevryding om skuld te erken en vergifnis te vra – van God en van die mense wat ek seergemaak het – is onbeskryflik. Ek hoef seker nie te sê dat ek almal wat my te na gekom het, reeds lankal vergewe het nie. Vergifnis is nie net ’n geestelike keuse nie; dit is medisyne vir die siel en liggaam. Dit verminder stres, angs en depressie. Dit versterk jou immuunstelsel en verhoudings. Dit bevry jou van die verlede om ’n positiewe toekoms te skep.

Ek is optimisties oor die toekoms. My eerste boek is vanjaar gepubliseer, en ek is opgewonde om aan te kondig dat my volgende boek – oor Pastorale sorg aan rouendes met 60 preeksketse vir begrafnisse – teen April 2026 op die rakke sal wees.

Tog omhels ek ook my kwesbaarheid. Dit is oké om “afdae” te hê. Kwesbaarheid is nie ’n swakheid nie, maar ’n noodsaaklike deel van ons menswees. Koester die lewe en die mense vir wie julle lief is. Die lewe is onvoorspelbaar, maar elke oomblik is ’n genadegawe.

Dankie dat julle saam met my kolf. Kom ons maak 2026 ’n jaar van vreugde, vrede en nuwe moontlikhede.

“64 nie uit nie—deur God se genade beskerm ek nog my paaltjies, en met vergifnis in my hart staan ek dankbaar by die crease.” Obé Phillips