KRONING VAN GHAAP WITBOOI AS KAPTEIN VAN DIE GRIEKWAS
Toespraak van Oudste Klaas Beesvel
Dames en Here,
Gerespekteerde Ouderlinge, gerespekteerde gaste, en gewaardeerde lede van die Griekwa gemeenskap,
Vandag kom ons hier saam om ‘n belangrike oomblik in ons geskiedenis te vier. Ons het saam gekom om die kroning van ons nuwe kaptein, Ghaap Witbooi, by te woon. Hierdie is nie net ‘n seremonie van leierskap nie, maar ‘n refleksie oor ons gedeelde verlede, ons huidige stryd, en ons hoop vir ‘n toekoms van kragtigheid en sterkte.
Dit is geen geheim dat die aankoms van die Voortrekkers en Engelse koloniale meesters na ons geliefde Griekwaland ons pad wat ons lankal vir onsself voorsien het, versteur het nie. Ons voorvaders se reis na onafhanklikheid was nie ‘n maklike een nie, aangesien hulle ontelbare uitdagings in die gesig gestaar het, insluitend die verlies van ons land en tradisionele bronne. Ons is in ‘n see van vinnige sosiale verandering gegooi, wat ons manier van lewe en onafhanklikheid bedreig het.
Gedurende die loop van die 18de eeu het nuwe gemeenskappe ontstaan, gedefinieer deur ras, kultuur, godsdiens, en toegang tot land en mag. Onder hierdie gemeenskappe het die Basters soos ons eers genoem was ‘n unieke en sentrale rol gespeel in die vorming van ons geskiedenis. Gebore uit verbintenisse tussen Europeërs, slawe, en Khoikhoi, het ons Griekwas vaardighede, taal, en kennis saamgedra wat ons onderskei het.
Maar ondanks hierdie teenkantings, het ons mense sterk en beginselvas gebly. Ons het aangepas, geleer, en volgehou. Ons het ons ryk erfenis omhels, diep gewortel in ons liefde vir hierdie land en sy tradisies. Ons het maniere gevind om ons gees lewendig te hou, deur ons stories, taal, en gebruike mondelings oor te dra.
Soos ons Ghaap Witbooi vandag kroon, laat ons onthou die reis wat ons hierheen gebring het. Laat ons eer betoon aan diegene wat voor ons gekom het, wat geveg het om ons erfenis en identiteit te bewaar. Laat ons verbind tot samewerking onder Kaptein Ghaap se leierskap, en ‘n toekoms smee wat so helder is soos die gees van ons voorvaders.
Saam sal ons die uitdagings wat ons in die gesig staar, oorkom. Saam sal ons ons nalatenskap beskerm en eer. Saam sal ons vorentoe marsjeer met trots en eenheid, wetende dat ons die bewakers is van ons verlede is. Saam is ons die bewaarders van ons hede, en die visionêre van ons toekoms. SAAM IS ONS GRIEKWAS!!!!!
Dankie. Dankie, kom ons raak weer stil. Mag Ghaap Witbooi se leierskap ons na groter hoogtes lei en ons help om te floreer as ‘n trotse en verenigde Griekwa-gemeenskap.
“Ghaap Witbooi staan asseblief vir die eed aflegging. Sit jou hand op die Griekwa stam Bybel. Sê agter my aan .. “ Toe sê Ghaap “ Grootboetie Klaas dis nie nodig nie ek ken dit uit my kop uit..”
Toe sê Ghaap met die nodige eerbied en ontsag “ In die teenwoordigheid van die Drie-enige God en die Griekwavolk beloof ek, Ghaap Witbooi oudste seun van Plaatjie Witbooi die volgende: Dat ek die onafhanklikheid en die grondgebied van die Koninkryk van Griekwaland-Wes met al my vermoë sal verdedig en bewaar; dat ek die vryheid en die regte van alle Griekwas en alle inwoners sal beskerm, en tot instandhouding en bevordering van die welvaart alle middele sal aanwend wat die wette my ter beskikking stel, soos ‘n goeie en getroue Griekwa-Kaptein behoort te doen. Dit beloof ek! So waarlik help my God Almagtig!” sê Ghaap met sy linkerhand oop in die lug en die regterhand op die Bybel!
Môre die Kaptein van die Griekwas lewer sy kroonrede!