ALKOHOLMISBRUIK VRYDAG 30 AUGUSTUS 2024
1 PETRUS 4 VERSE 2 en 3: “…om die orige tyd in die vlees nie meer volgens die begeerlikhede van die mense te leef nie, maar volgens die wil van God. Want dit is genoeg dat ons die afgelope lewenstyd die wil van die heidene volbring het deur te wandel in ongebondenheid, begeerlikheid, dronkenskap, brasserye, drinkpartye en ongeoorloofde afgoderye.”
Die Bybel gee nie spesifieke reëls oor die gebruik van alkohol nie, maar dit gee duidelike riglyne oor die belangrikheid van selfbeheersing en die vermyding van dronkenskap. In ons teks word daar gepraat van die tyd wat ons voorheen in dronkenskap en losbandigheid deurgebring het, en dit word duidelik veroordeel. Die Skrif waarsku ons dat wanneer ons onder die invloed van alkohol is, ons beheer oor ons gedagtes en liggaam verloor—iets wat in direkte kontras is met die vrug van die Gees, wat selfbeheersing insluit (Galasiërs 5:22-23). As Christenmanne word ons geroep om sober te wees in ons denke en dade, om ons liggame as tempels van die Heilige Gees te beskou en nie toe te laat dat enige iets, insluitend alkohol, ons beheer nie.
Terwyl die Bybel nie sê dat alle gebruik van alkohol verkeerd is nie, moet ons dit met groot omsigtigheid benader. Jesus het wyn gemaak by die bruilof in Kana (Johannes 2:1-12), en Paulus het aan Timoteus gesê om ‘n bietjie wyn te gebruik vir sy gesondheid (1 Timoteus 5:23). Hierdie voorbeelde wys dat alkohol in matigheid gebruik kan word. Maar die vraag wat elke Christenman moet vra, is nie net of dit toelaatbaar is om te drink nie, MAAR OF DIT WYS IS!!! Ons moet nadink oor hoe ons keuses ons eie geestelike gesondheid en die mense rondom ons beïnvloed. Dronkenskap kan verhoudings skade doen, gesinne verdeel en ‘n negatiewe getuienis vir ander wees.
As Christenmanne het ons die verantwoordelikheid om ons lewens te lei op ‘n manier wat Christus eer. Ons moet ons gedrag in alle aspekte van ons lewens, insluitend die gebruik van alkohol, rig volgens die wet van liefde (Jakobus 2:8). Dit beteken dat ons ons eie begeertes moet onderdruk om die beste belang van ander te dien. Soos Paulus in 1 Korintiërs 10:23-33 sê, moet ons nie net dink aan wat ons mag doen nie, maar eerder oor hoe ons keuses ander kan beïnvloed. Dronkenskap is ‘n sterk versoeking wat lei tot vernietiging, en daarom moet ons met groot versigtigheid en selfbeheersing optree. My advies as jy nie tevrede is met slegs 250 ml bier, of 100 ml wyn, of 36 ml van ‘n gedistilleerde drank per dag, stop dan daarmee.
GEBED Hemelse Vader, ons kom na U met ‘n hart van dankbaarheid vir die wysheid en leiding wat U aan ons gee deur U Woord. Help ons, as Christenmanne, om die vrug van die Gees in ons lewens uit te leef, veral in die gebied van selfbeheersing. Gee ons die krag om sterk te staan teen die versoekings wat alkohol kan bring, en help ons om besluite te neem wat U eer en ander opbou. Mag ons lewens ‘n getuie wees van U liefde en genade in alles wat ons doen. In Jesus se Naam bid ons, AMEN