ALKOHOLMISBRUIK VRYDAG 6 SEPTEMBER 2024
SPREUKE 23 VERSE 29 TOT 32 “By wie is „Ag!”; by wie is „Wee my!”; by wie is getwis; by wie is geklaag; by wie is wonde sonder oorsaak; by wie is dofheid van oë? By die wat láát opbly by die wyn, by die wat ingaan om gemengde drank te proe. Kyk nie na die wyn as dit rooiagtig lyk, as dit sy glans gee in die beker, glad na binne gly nie: op die end byt dit soos ‘n slang en spuug gif uit soos ‘n basilisk. Jou oë sal vreemde dinge sien en jou hart verkeerde dinge spreek.”
Die skrywer herinner ons aan die bitter gevolge van alkoholmisbruik en hoe dit huishoudings kan verwoes. Die skrywer vra: “By wie is daar ag, by wie is daar wee?” Die antwoord is hartverskeurend: dit is by diegene wat hulle verlustig in die wyn, wat te lank aan die drank vasklou. Die prentjie wat hier geskets word, is een van chaos en lyding—’n huis gevul met stryery, geklaag, en pyn wat onnodig veroorsaak word. Alkohol, wat eers onskuldig lyk en maklik ingaan, verander uiteindelik in ’n slang wat byt en gif spuit. Hierdie beeld is ‘n kragtige waarskuwing oor hoe alkohol huishoudings kan vernietig deur verhoudings te vergiftig en vreugde in hartseer te verander.
Wanneer ons dink aan die vroue wat huil oor die geld wat in Drankwinkels en Taverns verkwis is, en die kinders wat honger ly omdat broodgeld aan drank gespandeer is, word ons gekonfronteer met die wrede werklikheid van alkoholmisbruik. Dit is nie net die drinker wat ly nie, maar die hele gesin, wat dikwels gebroke en in ellende gelaat word. Dit is hartseer om te dink hoe ‘n huishouding, wat ‘n plek van liefde en veiligheid moet wees, in ‘n slagveld verander weens alkohol. Die Bybel waarsku ons teen hierdie pad van selfvernietiging, en ons gewete roep ons op om anders te leef.
As Christene word ons geroep om ons naaste lief te hê en te beskerm. Wanneer ons bewus is van die skade wat alkohol kan aanrig, veral in die lewens van diegene wat swak is, moet ons ernstig oorweeg om van alkohol af te sien. Dit is nie net ’n daad van selfbehoud nie, maar ook ’n daad van liefde en verantwoordelikheid teenoor ons gesinne en gemeenskap. Die roeping om te kies vir matigheid of selfs geheelonthouding is ’n roeping om te bou, te bewaar en te beskerm—om te weier dat ons huishoudings vernietig word deur die slang van alkoholmisbruik.
GEBED Here, U sien die hartseer en vernietiging wat alkohol in soveel huishoudings veroorsaak. Ons bid vir diegene wat ly onder die las van alkoholmisbruik, en vra dat U hulle sal troos en genees. Gee ons die wysheid en krag om gesonde keuses te maak, wat ons gesinne en gemeenskap beskerm. Help ons om selfbeheersing te beoefen en ander lief te hê deur ons optrede, sodat ons ’n bron van hoop en genesing kan wees vir diegene wat deur alkohol verwoes is. In Jesus se Naam bid ons, AMEN